Nattsigling

I går (sundag) lista vi oss ut fra Ula utan motor. Vi hadde fin vind til vi runda Svenner fyr, då vart det brått vindstilt. Etter ein times tid byrja han å blese att, men så svakt at vi berre snigla oss av garde mot Sørlandet. Dagens høgdepunkt var då ei nise kom opp etter luft rett ved båten. Ellers slo vi i hel tida på ulikt vis, eg tydde til boka mi og ein kopp (!) Chardonnay, Jared turna forsiktig på baugspydet.

Då kvelden kom hadde vi berre så vidt nådd Jomfruland, og kapteinen beslutta at vi skulle sigle natta gjennom. Som B-menneske tok han fyrste vakta, medan eg tok på meg hundevakta. Eg kom opp på dekk i 2-tida, til gnistrande stjernehimmel med nordlys. Bak oss glitra det i moreld, det var nett som å sigle på sin eigen lille Mjølkeveg!

Det er noko eige med å få eineansvaret for båt og mannskap (Mannskapet eg hadde ansvar for tel berre ein person, men han har ein viss afeksjonsverdi for meg). Når sola nærma seg horisonten fekk eg selskap av fiskabåtane som var på veg til land, og det var godt å kjenne lyset og varmen frå sola i andletet etter timesvis i myrkre.

Etter felles frukost og vaktskifte tok eg meg ein velfortjent lur. No har vinden friskna og vi suser av garde mot Lillesand, der vi skal tilbringe natta i ei naturhavn ved ei lita øy som heiter Auesøya.